Հայաստանում որոշ ուսանողներ կկարողանան զինծառայությունից տարկետում ստանալ

Հայաստանում որոշ ուսանողներ կկարողանան զինծառայությունից տարկետում ստանալ։ Այս մասին այսօր՝ սեպտեմբերի 14-ին, Ազգային ժողովի նիստում «Զինվորական ծառայության եւ զինծառայողի կարգավիճակի մասին» օրենքում փոփոխություններ կատարելու մասին օրենքի նախագծի քննարկման ժամանակ հայտարարեց ՀՀ կրթության, գիտության, մշակույթի եւ սպորտի նախարար Վահրամ Դումանյանը։ Խոսքը, մասնավորապես, բնական գիտությունների, տեխնոլոգիայի, ինժեներիայի եւ մաթեմատիկայի մասին է։ Նախարարի խոսքով՝ այս խնդիրն առաջացել է դեռեւս 2017 թվականին, երբ փոփոխություններ կատարվեցին պարտադիր զինվորական ծառայության մասին օրենքում։ Բոլորը պարտավորվում էին ծառայել բանակում։ Միաժամանակ բազմաթիվ ուսանողներ բակալավրիատում, մագիստրատուրայում, ասպիրանտուրայում սովորելիս նախկինում տարկետում էին ստացել։ Արդյունքում գրեթե բոլորը հետագայում բախվեցին այդ խնդրին։ Այսպիսով, 27 տարեկանում կամ պետք էր ծառայել կամ ինչ-որ կերպ ազատվել զինծառայությունից։ Ըստ էության, ասպիրանտի կրթությունը մնում էր կիսատ։ Այս առնչությամբ ուսման տարկետում ստացած եւ 27 տարին լրացածների համար իշխանությունն առաջարկում է նոր տարիքային շեմ սահմանել՝ 28 տարեկան։ «Խորհրդային տարիներին դպրոցում կրթությունը տեւում էր 10 տարի։ Հիմա 12 տարի է։ Շատ աշակերտներ ավարտում են դպրոցը 18 տարեկանում: Միաժամանակ բակալավրիատի ուսանողները սովորում են 4 տարի, մագիստրատուրայում՝ 2 տարի, իսկ ասպիրանտուրայում՝ 3 տարի։ Եվ վերը նշվածի հետ կապված՝ որոշեցինք 27 տարին դարձնել 28»,-պարզաբանեց Դումանյանը՝ նշելով, որ համապատասխան պայմանագրեր կկնքվեն ուսանողների հետ։