Կրթությունը պետք է զարգացնել վերապատրաստումներով. փորձագետ

Դպրոցի տնօրենի հավաստագրման ընթացակարգերից առաջարկվում է հանել հարցազրույցի փուլն ու պարտադիր վերապատրաստման պահանջը։ Կրթական հարցերի փորձագետը նշում է, որ մեխանիկական փոփոխություններով արդյունքի չենք հասնի։

Կրթության ոլորտում ամեն ինչ մեխանիկական հարթության մեջ դնելով` որակի վրա որևէ ազդեցություն չենք ունենա։ Sputnik Արմենիայի հետ զրույցում նման կարծիք հայտնեց կրթական հարցերով փորձագետ Ատոմ Մխիթարյանը` անդրադառնալով ՀՀ կրթության, գիտության, մշակույթի և սպորտի նախարարության առաջարկած նախագծին։ Գերատեսչությունը հանրակրթական ուսումնական հաստատության ղեկավարման իրավունք (հավաստագիր) ստանալու քննություն կազմակերպելու, անցկացնելու, ինչպես նաև հանձնաժողով ձևավորելու կարգերում փոփոխություն կատարելու մասին նախագծեր է հանրային քննարկման ներկայացրել և առաջարկում է հանել հարցազրույցի փուլն ու պարտադիր վերապատրաստման պահանջը։ Հայաստանի 5 բուհերում կհիմնադրվեն գիտահետազոտական կենտրոններ «Տնօրենների ընտրության կարգը վստահություն չի ներշնչում հասարակությանը։ Նա, ով ուզում է դպրոցի տնօրեն դառնալ, մի քանի օրենք է սովորում, անգիր անում որոշ բաներ, թեստը լրացնում է, և վերջ։ Դրանից հետո ո՛չ այդ օրենքներն է կիրառում իր գործում, ո՛չ էլ թեստերը լրացնելով ինչ–որ հմտություններ է ձեռք բերում»,–ասում է Մխիթարյանը։ Նա կարծում է, որ պետք է վերապատրաստումների, փորձի փոխանակման վրա ուշադրություն դարձնել, ոչ թե վերապատրաստումը հանել տնօրեն ընտրվելու գործընթացից։ Փորձագետը նշում է` կրթությունը պետք է զարգացնել վերապատրաստումներով, որպեսզի կարողանանք ապահովել այն մակարդակը, որին ձգտում ենք։ Մխիթարյանը հիշեցնում է` վերջին տարիներին քիչ չէին դեպքերը, երբ գործող իշխանության ցանկալի թեկնածուն, անկախ այն հանգամանքից, թե ինչ վերաբերմունք ուներ նրա նկատմամբ հասարակությունը, տվյալ դպրոցի կոլեկտիվը, աշակերտներն ու ծնողները, դառնում էին դպրոցի տնօրեն, և դա արվում էր մեխանիկական ինչ–որ թեստեր լրացնելու արդյունքում։ «Մեխանիկական փոփոխությունները որևէ արդյունքի չեն բերի։ Կա նաև մեկ այլ հանգամանք. վերապատրաստման պահանջը հանում են, քանի որ շատ չեն մասնագետները, սակայն պետք է այս խնդրին լուծում տալ։ Այսինքն` պատրաստել նաև մասնագետներ, որոնք կզբաղվեն վերապատրաստումներով։ Սրանք կբերեն կառավարման որակի և կրթության մակարդակի բարձրացման»,–ասաց նա` ընդգծելով, որ կրթությունը չեն զարգացնում անընդհատ քննություններ կազմակերպելով։ Հիշեցնենք` գործող կարգի համաձայն` դպրոցի տնօրենի հավաստագրման համար կարող է դիմել միայն վերապատրաստում անցած անձը, որն ունի բարձրագույն կրթություն և վերջին 10 տարվա ընթացքում մանկավարժական, գիտամանկավարժական աշխատանքի և կրթության կառավարման ոլորտի առնվազն 7 տարվա ընդհանուր աշխատանքային ստաժ: Իսկ նոր կարգը ընդունվելու դեպքում ուժի մեջ կմտնի 2023 թվականի հունվարից: